اعرف ازاي تحسن ثقتك بنفسك

دايما بتسمع جملة ” علشان الناس تحبك لازم تتعلم الأول تحب نفسك ” ، فمن المهم انك تحسن احترامك لنفسك .

علشان كده في موقع اعرف ازاي هنعملك قائمة بـ 10 خطوات أو نصائح علشان تزود احترامك وحبك لنفسك ، وده هيحسن ثقتك بنفسك .

اعرف ازاي تحسن ثقتك بنفسك

1- سامح نفسك

أول حاجه لازم تتعلمها أنك تسامح نفسك ، التسامح مش مجرد أنك تسامح ناس تانية على الغلطات اللي عملوها ، لازم تسامح نفسك على كل حاجة غلط أنت عملتها أو قولتها .

مش معنى أنك تسامح نفسك أنك تنسى اللي عملتوه , لا الفكرة ازاي انك تتصالح مع الغلطات السوده اللي أنت عملتها ،

وتتقبل اللي حصل مهما كان ، العملية بتبقى صعبة لو أنت مبدأتش فيها ، أبدا من دلوقتي وسامح نفسك .

2- إفهم أنك مش ممكن تتحكم في كل حاجه  

في حاجات كتير في حياة كل واحد فينا لا يمكن أنك تتحكم فيها زي تصرفات الاخرين ، أسمك أو حتى جنسيتك ،

ومن أكتر الحاجات اللي مستحيل تتحكم فيها هي آراء الناس فيك ، ومهما حاولت مش هتعرف ترضي الكل .

لازم تاخد الخطوة وتعرف أنك مش مطالب تتحكم في كل حاجه حواليك ، ولو أصريت على كده هتقع في حفرة صعب تخرج منها .

3- إهتم بصحتك الجسدية 

اهتم بصحتك لانه جزء أساسي من الخطوات . وأهم حاجه أنك تتقبل نفسك زي ما هي .

ممارسة الرياضة شيء مهم جدا ، فالرياضة بتقوم بإفراز هرمونات الدوبامين ، والإندورفين ، والسيروتونين ، ودي هي اللي بتتسمى هرمونات السعادة أو المتعة .

ممارسة الرياضة هتغير في حياتك كتير ، وأيضا الأكل الصحي و الابتعاد عن العادات السيئة زي التدخين .

4- إهتم بصحتك العقلية والنفسية

صحتك النفسية متقلش في الأهمية عن صحتك الجسدية ، بل بالعكس ممكن تزيد في الاهمية .

علشان كده في حاجات كتير لازم تعملها علشان تحافظ على صحتك العقلية والنفسية:

1. متقضيش كل وقتك في الشغل بس . لازم تدخل في حياتك الحاجات اللي بتحبها.
2. خصص وقت دايم للعائلة ولأصحابك.
3. ابعد نفسك عن كل الأخبار الوحشة.
4. ابعد عن الناس اللي بينكدوا عليك .
5. دخل عادات إيجابية جديدة في حياتك.

5- ابتعد عن الصحبة السيئة

علشان تتعلم تحب نفسك وتقدرها لازم تكون البيئة اللي حواليك بيئة ايجابية ، ابعد عن الناس اللي كل كلامهم سلبي بس ، أو كل كلامهم انتقاد ليك وتقليل منك .

وزي ما قولنا فوق أنك مش هتعرف تتحكم في كل آراء الناس بس في الحالة دي أنت ممكن تبعد نفسك عنهم وتقلل من التعامل معهم لراحتك النفسية .

6- امدح نفسك لو مرة في اليوم 

هي حاجه ممكن تقولها أنها غريبة بس لا ، أنت بتقدر ذاتك زي ما بتقدر الآخرين لازم تمدح نفسك لما تعمل شيء كويس .

متخفش انك تحتفل بنفسك لما تعمل انجاز حتى لو بسيط ، ده خطوة مهمة علشان تحب نفسك .

7- عبر عن مشاعرك من غير خوف

سواء كانت مشاعر سلبية أو ايجابية عبر عنها من غير أي خوف ، غضب و حزن أو سعادة و فرح ، طلع اللي جواك ومتكتمش مشاعرك .

ولكن لو عرفت تتحكم في المشاعر دي وامتى تعرف تطلعها ومع مين هتكون خدت خطوة كبيرة في عملية تعزيز ثقتك بنفسك .

8- دلع نفسك بانتظام 

من الطبيعي أنك بتشتري هدايا سواء لأصحابك أو شريك حياتك أو عائلتك , لكن هنا عاوزينك تشتري لنفسك هدايا ،

كل فترة دلع نفسك واشتري لنفسك هدية تكون محتاجها ونفسك فيها ، اعمل الموضوع ده بانتظام هيكون ليه تأثير كبير على حياتك .

9- تعاطف مع نفسك

دايما فكر في الأوقات اللي بتتعاطف فيها مع صحبك أو زميلك . ايه اللي أنت قولته أو عملته علشان تخليه يحس بالرضا ،

وطبق ده مع نفسك لما تحس أنك محتاج تعاطف أو تكون في موقف مش كويس ،

10- إهتم بالجانب الروحي

يعتبر أهم خطوة من خطوات تعزيز ثقتك بنفسك هو الاهتمام بالجانب الديني في حياتك ، و الإلتزام بالصلاة و كل أركان الدين ،

هيعطيك الراحة النفسية والعقلية اللي تخليك تحب نفسك وتقدرها .

هي دي العشر خطوات اللي بيها تعرف تحسن ثقتك بنفسك .. شاركونا آرائكم في التعليقات