عودة مانجا هانتر وأسرار عودة أنمي hunter x hunter
زى ما كلنا شوفنا مؤخرا تأكيد عودة مانجا هانتر هانتر بعد توقف دام 4 سنين تقريبا من 2018 واللى تم تأكيد الخبر اولا من عن طريق المانجاكا
— 冨樫義博 (@Un4v5s8bgsVk9Xp) September 28, 2022
(كاتب ورسام) هانتر توجاشى سينسى عن طريق تويتر الخاص بيه ، واللى الناس مكانتش مقتنعة انه حقيقى وانه تويتر الخاص بيه فعلا لولا تأكيد من شويشا اللى هى الشركة الناشرة مالكة لشونين جامب المجلة اللى بيتعرض فيها مانجا هانتر , فى اكونت تويتر دا الاستاذ توجاشى بيعمل ابديتس للناس عن هو بيكتب فى ايه ووصل لإيه لحد دلوقتى كدا تقريبا دا الاكونت الوحيد اللى انا عامله نوتيفيكشن على تويتر , المانجا كانت متوقفه عند الشابتر 390
取り敢えず、あと1話。
着色前提で描き始めて色塗り無しに
して没ったヤツ。#描いたのはかなり前 pic.twitter.com/L9LCBQPW9O— 冨樫義博 (@Un4v5s8bgsVk9Xp) July 7, 2022
فهو حسب كلامه حوالى 10 شباتر خلصانين يعنى حوالى 10 اسابيع من مانجا هانتر هانتر وهو دلوقتى شغال على الستورى بورد الخاصة بالعشرة اللى بعدهم يا رب ينجزهم بالسلامة و يكمل بعدها على خير وميوقفش تانى
بالنسبة لموعد عودة المانجا فتم التأكيد من تويتر الرسمى لمجلة شونين جمب على عودة مانجا هانتر فى يوم الجمعة الرابع من نوفمبر رسميا رسميا رسميا !!!
انمى هانتر x هانتر
انمى هانتر توقف سنة 2014 و الانمى أخذ من المانجا حوالى 339 شابتر
فالانمى كان ماشى بمعدل شابترين او حوالى 2.3 شابترز للحلقة ودا معدل معقول فلو حسبنا حاليا 390-339 = هيبقا عندنا حوالى 51 شابتر بإضافة العشرين شابتر اللى بيتم تجهيزهم حاليا لو طلعو لينا على خير هيبقوا حوالى 71 شابتر لو قسمناهم على معدل تحويل المانجا لأنمى اللى كان ماشى عليهم انمى هانتر هيبقا عندنا حوالى 30 حلقة
ودول محتوى كويس بس أظن انه من الافضل الانتظار لإنتهاء الأرك الحالى فى المانجا اللى شغال حاليا بس انا مش عاوز ادخل فى تفاصيل احداث حاليا هل ال20 شابتر اللى بيجهزهم الاستاذ توجاشى هيخلص فيهم الأرك اظن صعب جدا.
ولو توقف تانى هتبقا مصيبة فالحل انه يفضل مكمل فى رسم المانجا لحد على الأقل انه يخلص الأرك الحالى فكدا احنا قدامنا 20 شابتر دول و السنة فيها حوالى 51 اسبوعي فالأستاذ توجاشى لو تكرم علينا وفضل يشتغل فترة اقل من سنة حتا لو اخد راحات قليلة ففعليا فى اقل من سنة ممكن يكون عندنا محتوى يعمل سيزون جديد من انمى هانتر !
بس فيه مشكلة تانية ألا وهى استديو ماد هاوس لو متعرفش فأستديو انمى هانتر اسمه ماد هاوس ودا كان استديو عظيم جدا فى وقته عمل انميات تعتبر من الكلاسيكس زى ديث نوت و مانستر و الجزء الاول من ون بانش امان هاجيمى نو ايبو , وافلام عظيمة زى بيرفيكت بلو و ريد لاين و بابريكا .
بس الاستديو دا مؤخرا مش بقوته ابدا وتقريبا معملش اى اعمال ليها اسم مؤخرا حتا انه استغنى عن الجزء التانى من ون بانش مان وداه لأستديو تعبان جدا وتم عمل تقريبا اكبر موسم انمى محبط لفانز ون بانش مان بعد الموسم الاولانى الفشيخ , فانا خايف جدا من نفس المصير لأنمى هانتر!
اما بالنسبة للأحداث الموضوع دا ممكن يكون فيه حرق بسيط انا مش هقول احداث هجاوب على .
هل جون مبقاش بطل هانتر هانتر حاليا ؟
الجواب هو ايوا جون مظهرش خالص فى الارك الحالى و تقريبا كدا مش هنشوفه لمدة كبيرة البطل الحالى هو كورابيكا وهو يا عينى مفشوخ على الأخر , وممكن بعده جينج فيركس و ليوريو و شخصيات جديدة كتير جامدة جدا الأرك الحالى مليان كلام و خطط و حوارات كبيرة وتفاصيل كتير جدا المشكلة ان الارك دا يعتبر صغير او تمهيد للأرك القادم بعده فانا مش عارف ازاى دا ارك صغير لأن الحوار حاليا كبير جدا و مش عارف بوتنشال الأرك دا هيستمر قد ايه معنديش اى فكرة الحقيقة لأن الموضوع جد خطير يا جماعة !
كل اللى انا متأكد منه ان احنا هنستمتع جدا لو المانجا رجعت واستمرت فترة ورجع الانمى وهنرجع نستمتع بواحد من الاعمال الكلاسيكية الحديثة فى عالم الأنمى و الميديا عامة .
